عزومتك علينا

بسم الله الرحمن الرحيم

هلا بكل اعضاء وزوار دموع الورد

كل يوم هنزل لكم سفرة كاملة

تكون عونا لنا بدل مابنكون محتارين ونقول الكلمة اللي دايم نرددها هنطبخ ايه النهاردة


مع تميمة مش هتحتاري

تابعوني
قبل مانبدا السفرة والعزومة

هنقول ازاي تجهزي طلبات البيت في 3 خطوات


الخطوة الأولى
هاتي ورقة وقلم وادخلي المطبخ

أول حاجة المفروض تعمليها: إنك تجيبي ورقة وقلم، وتدخلي المطبخ علشان
تبدئي في فحص كل حاجة موجودة عندك، وتشوفي أنت ناقصك إيه؟! وتكتبيه في
الورقة...
وخدي بالك إنك تكتبي في الورقة دي أسماء الحاجات الأساسية اللي أنت
محتاجة لها زي "السكر والشاي والمكرونة والأرز والسمنة والزيت، وغيرها من
الحاجات اللي بيطلق عليها تموين للبيت، ويا ريت تعملي حسابك إنك تكتّري
شوية صغيرين من الكمية اللي هتجيبيها؛ فمثلاً لو كنت بتسخدمي 3 علب زيت في
الشهر يبقي اكتبي في الورقة دي إنك محتاجة 5، وده لأن زي ما إنت عارفة إن
استهلاك البيت بيزيد شوية في رمضان علشان العزومات كل سنة وأنت طيبة..
كمان هتكتبي في الورقة دي الحاجات الخاصة بشهر رمضان زي الياميش مثلاً
ولوازم رمضان؛ بالإضافة إلى أسماء الخضروات والفاكهة واللحوم اللي إنت
محتاجة لها في رمضان...

وبكده إنت حددتي إنت محتاجة إيه؟!

الخطوة الثانية
انزلي السوق



بعد ما حددتِ الطلبات اللي إنتِ
عايزاها، والكمية اللي إنتِ عايزاها، انزلي السوق أو السوبر ماركت وهاتي
الطلبات اللي إنتِ عايزاها...

وعلشان تبقي ناصحة وما حدش يضحك عليكي هنقدم لك دلوقتي جدول بسيط نشرح لك فيه طريقة شراء احتياجات البيت

الطيور "الفراخ أو الحمام أو البط"	لو هتشتريها صابحة من عند الفرارجي يبقى خدي بالك إن جلدها يكون متماسك وكل لون واحد، وما فيش عليه أي آثار للكدمات زي إنه يكون مزرِق مثلاً، لكن لو هتشتري الطيور دي من السوبر ماركت أكيد طبعاً هتكون مجمدة.. في الحالة دي تاخدي بالك إن ما يكونش فيها أي آثار للماء أو بلورات الثلج يعني تكون متجمدة كويس، وتاخديها وتروحي على البيت على طول، وتحطيها في الفريزر علشان ما تديش فرصة إن التلج بتاعها يفك.. بس نصيحة بيني وبينك الطيور الطازجة أحسن مية مرة من الطيور المجمدة.
اللحمة	لازم تكون من عند جزار موثوق فيه، علشان تتأكدي إن اللحمة دي كويسة وخدي بالك إن لون اللحمة يكون وردي قاتم وتجنبي نهائياً اللحم المخضر المائل إلى الرمادي أو المبلل لأن دي بتبقى لحمة فاسدة.
السمك	السمك سواء اللي بيعيش في الميه المالحة أو العذبة لازم يكون عيونه لامعة ممتلئة ورطبة، وخياشيم السمكة نظيفة لونها أحمر، وما يكونش عليها أي أثر لمادة لزجة، وجلد السمكة يكون بيلمع ورطب، وألوانه واضحة وصلب، ما فيش فيه أي خدوش. لكن لو كنتِ هتشتري سمك فيليه يبقى خليكِ شاطرة واشتري السمكة كاملة، وبعد كده خلي اللي بيبيع يقطعها لك.
الخضراوات أو الفاكهة	يا ريت برضه إنك تشتري الخضراوات والفاكهة الطازجة، ودي هتعرفيها من لونها.
المعلبات	لو رحتِ السوبر ماركت وحبيتِ إنك تشتري حاجات معلبة يبقى يا ريت إنك تشوفي تاريخ الصلاحية والانتهاء اللي بيكون مكتوب على العلبة، وكمان خدي بالك إن العلبة تكون مقفولة وسليمة وما فيش فيها أي أنحناءات.

الخطوة الثالثة
بعد ما ترجعي البيت

بعد ما ترجعي البيت دخّلي الحاجات اللي
جيبتيها المطبخ وغيّري هدومك، وهاتي مجموعة من الأكياس البلاستيك
النايلون؛ بس خدي بالك إن الأكياس دي تكون ناشفة ونظيفة جداً، وكمان هاتي
ورقة وقلم وسلوتيب، وده علشان تكتبي على كل كيس اسم اللي موجود جواه
وتلزقيه بالسلوتيب.
ودلوقتي هنشوف مع بعض جدول هنشرح لك فيه
طرق تخزين كل حاجة من الحاجات اللي إنت جيبتيها دي؛ لأن كل حاجة ليها طريقة معينة في التخزين علشان تستمر معاكي لأطول وقت ممكن

الطيور "الفراخ أو الحمام أو البط"	شيليها من الكيس بسرعة وابدئي في تنظيفها وده بأنك تغسيلها من جوه ومن بره وتشيلي أي آثار للريش أو أي دم موجود عليها وبعد كده تحطيها في طبق كبير، وتدعكيها كويس بالملح من جوه ومن بره، وتعصري عليها نص ليمونة وتسيبيها لمدة نص ساعة، وبعد كده تغسليها كويس تاني بالميه من الملح والليمون، وتحطيها في مصفاة، علشان تصفي الميه كويس، وبعد كده هاتي كيس بلاستيك ناشف وحطيها فيه، وفرغي منه الهواء واقفليه كويس وحطيه على طول في الفريزر.
اللحمة	طلعيها من الكيس البلاستيك وبعد كده حطيها في حلة وحطيها في التلاجة على الرف اللي تحت الفريزر لمدة أربع ساعات.. وبعد كده هاتي كيس بلاستيك ناشف وحطيها فيه وفرغي أي هواء في الكيس واقفليه كويس وشيليه في الفريزر.. نفس الشيء ده هتعمليه مع اللحمة المفرومة.
السمك	بعد ما تروحي البيت على طول طلعي السمك من الكيس بتاعه وابدئي في تنظيفه كويس. ودي طريقة تنظيف السمك: 1. امسكي وسط السمكة وقشري جلدها باتجاه الرأس بسكين. 2. قصي الزعانف بواسطة مقص حاد. شقي جانب السمكة بسكين حادة كبيرة من أسفل رأسها حتى بداية ذيلها، وتأكدي من أنها قد شقت جيداً من الداخل شيلي الأمعاء ونظفي بطن السمكة كويس. 3. بعد كده ابدئي في تنظيف السمك بالميه الباردة وبأكد بالميه الباردة، وبعد كده حطيه في مصفاة وسيبيه علشان يصفي ميته وحطيه في كيس بلاستيك ناشف وشيليه في الفريزر.
الخضراوات أو الفاكهة لو كنت جايبة كمية كبيرة من الخضروات والفاكهة يبقى ياريت إنك تحتفظي بالخضار والفاكهة اللي إنتِ مش محتاجة لها لحين الاحتياج لها. ودي طريقة بسيطة جداً لحفظ الخضار والفاكهة... _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ الخضروات الورقية اللي زي النعناع والبقدونس والشبت والكزبرة والجرجير حطيهم في كيس بلاستيك ناشف من غير ما تغسليهم وتحطيهم في التلاجة، ودي أحسن طريقة تخليهم يعيشوا معاكِ في التلاجة لمدة أسبوعين.. الطماطم لو كانت الطماطم طرية يبقى اغسليها كويس، وبعد كده قطعيها واضربيها في الخلاط لغاية ما تبقى عصير، بعد كده صفيها وحطيها في أكياس نايلون ناشفة وحطيها في الفريزر لحين الاستخدام. لكن لو كانت الطماطم جامدة يبقى حطيها في مصفاة وحطيها في الثلاجة زي ما هي. البامية هاتي البامية اللي إنتي عايزة تجمديها، واغلسيها كويس، وبعد كده حطيها في مصفاة علشان تتخلص من أي ميه فيها.... بعد كده هاتي السكينة وابدئي في تقميع البامية بإنك تشيلي الجزء العلوي منها بشكل هرمي، واوعي تقطعيها من النص أو من الطرف؛ لأن ده ممكن يخليها تنزل العصارة اللي فيها. بعد كده أغلي ميه، وحطي عليها نصف ليمونة ومعلقة ملح، بعد كده حطي فيها البامية لمدة خمس دقائق، وبعد كده شيليها من الميه المغلية، وحطيها في مصفاة، وافتحي عليها الحنفية بميه باردة، بعد كده سيبيها شوية علشان تصفي الميه اللي فيها... بعد ما تتأكدي إنها ما بقاش فيها ميه نهائي هاتي كيس نايلون، وحطي فيه الباميه، بس خدي بالك وإنتِ بتحطيها إنك تفرّغي الكيس من أي هواء، بعد كده اقفلي الكيس كويس وحطيه في الفريزر.. البسلة والفاصوليا هاتي البسلة وفصصيها واغسليها كويس وحطيها في المصفاة. بعد كده هاتي حلة كبيرة فيها ميه، وضيفي ليها معلقة كبيرة ملح وسيبي الميه تغلي على النار، بعد ما تغلي ضيفي إليها البسلة وسيبيها لمدة 5 دقائق بعد كده حطيها في المصفاة، واغسليها على طول بميه باردة من الحنفية، وده علشان تحافظي على لونها الأخضر وعلى القيمة الغذائية اللي فيها. بعد كده سيبيها شوية علشان تصفي الميه اللي فيها... بعد ما تتأكدي إن ما بقاش فيها ميه نهائي هاتي كيس نايلون، وحطي فيه البسلة؛ بس خدي بالك وإنتِ بتحطيها إنك تفرّغي الكيس من أي هواء، بعد كده اقفلي الكيس كويس وحطيه في الفريزر... ونفس الشيء مع الفاصوليا.. ورق العنب هاتي ورق العنب واغسليه كويس، وبعد كده حطيه في ميه مغلية لمدة 3 دقائق، وشيليه منها وحطيه في مصفاة يصفي ميته، ويبرد، بعد كده لفّيه في فوطة ناشفة وحطيه في أكياس نايلون بس برضه اتأكدي إن الكيس ما فيهوش أي أثر للهواء، وبعد كده حطيه في الفريرز. الملوخية هاتي الملوخية وقطفيها واغسليها كويس، وحطيها في مصفاة علشان تصفي ميتها كويس، وبعد كده خرّطيها وحطّيها في أكياس نايلون ناشفة وحطيها في الفريزر. البصل والثوم والبطاطس دول مش محتاجين إنك تحطيهم في الثلاجة لأنك ممكن تحطيهم في مصفاة وتحطيهم في أي زاوية من زوايا المطبخ. الفاكهة من الممكن إنك تغسليها وتنشفيها كويس وبعد كده تحطيها في كيس بلاستيك ناشف، وتحطيها في الثلاجة أو الفريزر.. أو ممكن تعمليها عصير وتحطيها في الفريزر. البهارات والتوابل يا ريت تحتفظي بالبهارات في مكان جاف؛ لأن الحرارة أو الرطوبة الزايدة بتخلي الأعشاب والبهارات الجافة تفقد نكهتها بسرعة. علشان كده يا ريت ما تخزنيش الأعشاب والبهارات الجافة بالقرب من أفران الغاز أو المايكروويف أو أي مصدر للحرارة أو الرطوبة؛ زي أجهزة غسل الصحون وغلايات الماء. وخليكي دايما عارفة إن الأعشاب والبهارات دي لو خزنتيها بشكل صح فده ممكن يخليها تحتفظ بنكهتها لمدة عام أو اتنين أو أكثر. الحبوب زي الفول والعدس ممكن تحطيها في أكياس بلاستيك وتقفليها كويس ودخليها التلاجة.. الياميش والمكسرات بالنسبة للياميش زي المشمشية والتين المجفف والمكسرات ممكن تحطيهم في أكياس وتحطيهم في التلاجة. الجبنة القريش ودي أكيد كلنا بنحبها في رمضان، وأحسن طريقة علشان تحافظي على الجبنة القريش في التلاجة أكبر فترة هي إنك تحطيها في لبن بارد ومعاها قرن فلفل أخضر حامي. أو إنك تغلي كوباية ميه، وبعد كده تسيبيها لغاية ما تبرد وبعد كده تضيفي إليها شوية ملح وتحطي فيها الجبنة وقرن شطة أخضر حامي.

وبكده تبقي إنت جهزتي كل حاجة عندك في البيت
وتقدري إنك تستقبلي رمضان...
وكمان تلاقي عندك وقت كافي خلال نهار رمضان أنك تعملي أشهى الأكلات...

وتابعينا يومياً طوال شهر رمضان

لأننا هنقدم لك كل يوم فكرة جديدة
لأشهى الأطباق اللي ممكن تعمليها على الفطار

عزومة رقم 1


العصير
قمر الدين


بما أننا اخترنا أن يكون معانا في الأسبوع الأول من رمضان أكلات من
المطبخ المصري، يبقى هتلاقي إن أهم حاجة بتميز السفرة المصرية في رمضان
هو؛ وجود كأسات عصير قمر الدين على السفرة، ودي أبسط طريقة لعمل العصير..
المقادير:-

• 1/2 لفة قمر الدين مقطعة قطعاً صغيرة
• 1/2 كوب مشمش مجفف
• 1/2 كوب سكر
• 3 أكواب مية
• مكعبات ثلج "اختياري"
الطريقة:-

انقعي
قمر الدين والمشمش المجفف مع بعض أول ما تصحي من النوم في المية، وقبل
أذان المغرب بنص ساعة ضيفي إليهم السكر والمية، واضربيهم مع بعض في
الخلاط، وبعد كده صفّيهم بالمصفاة السلك، وصبي عصير قمر الدين في كأسات
العصير وضيفي إليه مكعبات الثلج.

طبق الشوربة
شوربة الخضار بالشعرية



فيه بنات كتير مش بتحب إنها تاكل الخضار المطبوخ، ودي حاجة غلط جداً خصوصاً مع الصيام طول النهار...

فإيه رأيك لما تتغلبي على المشكلة دي وتعملي طبق
شوربة خضار، وعلى فكرة الطبق ده طعمه حلو جداً، وكمان خفيف على المعدة في
رمضان ده؛ غير أنه هيفتح نفسك على الأكل، وهيعوّض جسمك عن نسبة السوائل
اللي ممكن يفقدها بسبب الصيام، ودي أسهل طريقة لعمل شوربة الخضار...
المقادير:-

• 1/4 كيلو بسلة
• 1/4 كيلو فاصوليا خضراء
• 2 حبة جزر مقطعة مكعبات متوسطة الحجم
• 2حبة بطاطس مقطعة مكعبات متوسطة الحجم
• 2 حبة كوسا مقطعة مكعبات متوسطة الحجم
• 1/2 كوب شعرية
• معلقتين سمنة
• معلقة ملح وفلفل
• شوربة فراخ أو لحمة
• مكعب مرقة دجاج "اختياري"
• حزمة بقدونس مقطعة قطع صغيرة "للتجميل"
• عصير ليمونة "اختياري"
الطريقة:-

1- هاتي
حلة صغيرة واسلقي فيها البسلة والفاصوليا، وبعد كده اغسليهم بالمية
الباردة، وحطيهم في المصفاة علشان تتخلصي من أي مية ممكن إنها تكون موجودة.
2- هاتي الحلة اللي هتعملي فيها الشوربة، وحطي فيها معلقتين سمنة،
وحطيها على النار، بعد كده ضيفي ليها الشعرية وقلبيها لغاية ما تحمرّ
ويبقى لونها ذهبي.
3- هاتي باقي الخضروات وضيفيها للشعرية، واستمري في التقليب لمدة عشر
دقائق، وبعد كده ضيفي إليهم "مكعب مرقة الدجاج" و"شوربة الفراخ أو اللحمة"
وسيبيهم على النار لمدة ربع ساعة أو لغاية ما الشوربة تغلي، بعد كده هدي
نار البوتجاز وسيبيها لمدة ربع ساعة أو لغاية ما تلاقي الخضار استوي اطفي
البوتجاز، وقبل أذان المغرب بربع ساعة صبي الشوربة في أطباق الشوربة،
وضيفي ليها البقدونس المقطع وعصير الليمون.


طبق السلطة
سلطة الزبادي

اخترنا لك النهارده طبق سلاطة الزبادي لأن ده أنسب حاجة للطبق الرئيسي اللي هنعمله النهارده ...
المقادير:-

• 3 فصوص ثوم مدقوق
• علبة زبادي
• ورقة نعناع جافّ أو أخضر
• خيارة مقطعة قطع صغيرة جداً أو مفرومة
• معلقة زيت ذرة
• معلقة فلفل أسود + معلقة ملح + معلقة كمون
الطريقة:-
حطي علبة الزبادي فى طبق السلطة، وضيفي إليها الثوم المدقوق والخيار
والملح والزيت والفلفل الأسود والكمون، وقلبيهم كلهم مع بعضهم كويس، وزيني
أطراف الطبق بالنعناع أو رشي على الطبق أوراق النعناع.

الطبق الرئيسي
بط محشي فريك



البط من الأطباق المشهورة جداً في المطبخ المصري
واللي كل المصريين بيحرصوا على وجوده على مائدة الإفطار في أول يوم رمضان،
وفيه أكتر من طريقة لعمل البط بس إحنا النهارده اخترنا لك الطريقة دي...
المقادير:-

• 1/2 كيلو فريك
• 1حبة طماطم مقطعة قطع صغيرة جداً
• 2 معلقة كبيرة زبدة
• 3 معالق كبيرة زيت عباد الشمس
• 3 بصلات مقطعة قطع صغيرة
• 3 حبات بطاطس مقطعة قطع صغيرة
• ملح وفلفل وبهارات
• 3 بصلات مقطعة شرائح
• ورق لاورو
• 3 أكواب مية دافية
• 1كوب كبير دقيق
• عصير ليمونة

الطريقة:-
1- هاتي الفريك واغسليه كويس وبعد كده حطيه في المصفاة.
2- هاتي حلة وحطي فيها الزبدة والزيت وحطيهم على النار لغاية ما
يسخنوا، وبعد كده ضيفي إليهم الفريك مع التقليب المستمر لغاية ما الفريك
لونه يبقى ذهبي.

3- لما تلاقي إن الفريك لونه بقى ذهبي ضيفي إليه الطماطم المبشورة
والبصل والبطاطس والملح والفلفل والبهارات، وشوحيهم على النار لمدة 10
دقائق مع التقليب المتسمر بس خدي بالك إن النار تكون هادية.
4- هاتي البطة ونظفيها كويس من جوه ومن بره واغسليها بالمية وبالملح
والدقيق والليمون وبعد كده اغسليها بالمية وبعد كده حطيها في المصفاة
علشان تصفي كل المية اللي فيها.

5- بعد كده هاتي شوكة واغرسي بيها جسم البطة في أماكن مختلفة بعد كده
ادهني قلب البطة بالملح والفلفل وابدئي في حشو قلبها بخلطة الفريك.
6- هاتي صينية الفرن وادهنيها سمنة وحطي فيها شرائح البصل المتبل
بالملح والفلفل وورق اللاورا، وحطي عليهم البطة ورشي الملح والفلفل
والبهارات على سطح البطة.
7- لو لقيتي إن فيه فريك باقي منك ممكن إنك تحطيه في ورق فويل وتلفيه كويس وتحطيه في صينية الفرن مع البطة.
8- ضيفي إلى الصينية كوباية مية دافية وغطي الصينية بالورق الفويل ودخليها الفرن على درجة حرارة متوسطة لمدة ساعة ونص.
9- بعد مرور الساعة ونص خرجي الصينية وشيلي من عليها الورق الفويل وسيبيها في الفرن لمدة نص ساعة كمان علشان وشها يحمر.
10- بعد مرور النص ساعة خرجيها وحطيها في طبق التقديم وزيني الطبق من على الأطراف بالبطاطس.

طبق الحلو
كنافة بالمكسرات



زي ما قمر الدين والبط المحشي من الأكلات
الرئيسية على السفرة المصرية في مصر، كمان طبق الكنافة من الأطباق
الرئيسية اللي بتلاقيها موجودة في كل بيت في رمضان، وعلى فكرة الكنافة لها
أكتر من طريقة بس النهارده هننتهز فرصة وجود ياميش رمضان ونعمل الكنافة
بالمكسرات، وإن شاء الله في الأيام اللي جاية نجيب طرق تانية كتير...

ومش محتاجة إني أفكرك إنك بلاش تعملي أكتر من صنف
حلويات كفاية صنف واحد بس وتعمليه على قد أفراد أسراتك أو على قد عدد
أفراد العزومة علشان ما فيش حاجة تفيض وتترمي.
المقادير:-

• 1/ 2 كيلو كنافة
• 1/ 4 كوباية زيت ذرة
• 1/ 2 كوباية زبدة أو سمنة
• 1/ 4 كوباية عين جمل أو جوز من غير قشرة
• 1/ 4 لوز من غير قشرة
• 1/ 4 كوباية بندق من غير قشرة
• 1/ 4 كوباية فستق من غير قشرة
• 1/ 2 كوباية زبيب

مقادير الشربات:

• 1/ 2 كوباية سكر
• 3/ 4 كوباية مية
• عصير ليمون
• فانيليا.

طريقة عمل الشربات:-

حطي السكر والمية كلهم مع بعض في إناء على نار هادئة لمدة ربع ساعة، بعد
كده ضيفي الليمون وسيبيه لمدة 5 دقائق لغاية ما يغلي، بعد كده حطي
الفانيليا وشيليه من على النار وسيبيه لغاية ما يبرد.

طريقة عمل الكنافة:-

1- هاتي المكسرات اللي عندك كلها وحطيها كلها في كيس بلاستيك ودقي فوقه
بإيد الهون علشان تكسري المكسرات إلى قطع صغيرة.. بعد ما تكسري المكسرات
حطيها في طبق وضيفي إليها الزبيب وقلبيهم مع بعض كويس.
2- قطعي الكنافة، بعد كده حطيها في صينية فيها زبدة سايحة واخلطي
الزبدة السايحة دي مع الكنافة كويس لغاية ما تلاقيها فعلاً اتشربت الزبدة
كلها.
3- هاتي صينية تانية وادهنيها بالزبدة وحطي فيها نصف كمية الكنافة واضغطي عليها كويس بإيدك علشان تبقى متماسكة.

4- رشي المكسرات اللي عندك، بعد كده ضيفي النصف الباقي من الكنافة واضغطي عليها بإيديك كويس علشان تتماسك.
5- حطيها في فرن متوسط الحرارة، وسيبيها لمدة نص ساعة أو لغاية ما
تلاقي وشها بقى لونه ذهبي ولو هتقدري إنك تقلبي الكنافة في نصف مدة الطهي
مع إضافة 1/ 2 معلقة كبيرة زبد أو سمن في الصينية وتدخليها الفرن تاني
(بعد ما تقلبيها)، وده علشان تبقى الكنافة لونها واحد من جميع النواحي،
بعد كده خرجيها من الفرن وقطعيها على حسب الحجم اللي إنتِ عايزاه وصبي
عليها الشربات البارد وبعد كده حطيها في طبق.

عزومة اليوم 5

العصير
عصير الموز باللبن واللوز


إيه رأيك لما تعملي النهارده عصير موز باللبن والوز؟‍!
المقادير:-

• 1/4 كيلو موز
• 3 أكواب لبن حليب بارد
• 1/4 كوب لوز أبيض منزوع القشور ومبشور
• 3 ملاعق سكر
• عصير ليمونة

الطريقة:-

اخلطي كل المقادير دي مع بعضها واضربيهم كلهم مع بعضهم في الخلاط الكهربائي، وبعد كده حطيهم في كوبيات العصير.






طبق الشوربة
شوربة الجزر




النهارده هنستفيد من الجزر في عمل طبق شوربة في منتهى الجمال ودي الطريقة...

المقادير:-

• 1/2 كيلو جزر
• 2 حبة بطاطس كبيرة
• 1 معلقة كبيرة بقدونس مفروم
• 1 معلقة كبيرة زبد
• شوربة فراخ أو لحمة أو مرقة دجاج + كوب مية
• بصلة مقطعة قطعاً صغيرة

الطريقة:-






1. هاتي الجزر والبطاطس واغسيلهم كويس وقشريهم، وبعد كده قطعيهم إلى قطع صغيرة.
2. هاتي حلة وحطي فيها الزبدة، وحمّري فيه البصل والجزر والبطاطس على نار منخفضة لمدة 15 دقيقة مع التقليب المستمرّ.


3. بعد مرور الربع ساعة ضيفي إليهم الشوربة والملح والفلفل، وسيبيهم
لغاية ما يغلوا وتلاقي الجزر والبطاطس بقت لينة. بعد كده اطفي البوتجاز،
وسييبها لغاية ما تبرد، وبعد كده اضربيهم مع بعض في الخلاط.
4. بعد ما تضربيهم في الخلاط هاتي الحلة وحطيهم على النار، وسخنيهم مرة
كمان، وبعد كده صبيهم في أطباق الشوربة، وزيني الطبق بالبقدونس المفروم،
وعلى فكرة ممكن لو لقيتي قوام الشوربة سميك ممكن إنك تضيفي المية السخنة
أثناء الغليان في المرة الثانية.

طبق السلاطة
سلاطة الفلفل المشوي بالبقدونس


المقادير:-

• 1 ثمرة فلفل أحمر متوسطة الحجم
• 1 ثمرة فلفل أخضر متوسطة الحجم
• 1/4 معلقة صغيرة فلفل أسود
• 1 ثمرة فلفل أصفر متوسطة الحجم
• نص حزمة بقدونس "للتزيين"
• 4 فصوص ثوم مفرومين

الطريقة:-





1. هاتي الفلفل واغسليه كويس، وبعد كده نشّفيه واشويه على نار متوسطة الحرارة مع تقليبه من جميع الجوانب.
2. بعد ما يشوى الفلفل سيبيه لغاية ما يبرد، وبعد كده قشريه، وشيلي البذر منه، وبعد كده قطعيه إلى قطع صغيرة.


3. هاتي طبق السلطة وحطي فيه الفلفل المقطع وتبليه بالملح والفلفل الأسود والثوم ممكن إنك تزيني الطبق بالبقدونس.

الطبق الرئيسي
مكرونة اسباجيتي بالفراخ المشوية




المقادير:-

• نص كيلو مكرونة اسباجيتي
• نصف كيلو صدور فراخ مشوية ومقطع شرائح بالطول
• فلفل ألوان مقطع شرائح بالطول
• 3 ملاعق كبيرة زيت الزيتون
• 3 فصوص ثوم مهروس
• نصف كوب جوز مدقوق
• ربع كوب جبنة تشيدر مبشورة

مقادير الصلصة:-

• 3 ملاعق كبيرة ريحان مجفف
• 2 معلقة كبيرة زيت الزيتون
• فص ثوم مهروس
• نصف كوب جبنة بارميزان
• نص كباية زيت ذرة



الطريقة:-


1. اسلقي
المكرونة في مية سخنة مضاف ليها الملح ونص معلقة زيت، بعد ما المكرونة
تتسلق كويس اغسليها بمية باردة، وسيبيها في المصفاة.
2. بعد كده ابدئي في تحضير الصلصة بإنك تحطي كل مكوناتها في الخلاط وتضربيهم مع بعض كويس.


3. هاتي صينية وسخني فيها زيت الزيتون، وحمري الثوم ثم اضيفي ليها
الفراخ مع الصلصة المعدة سابقاً وقلبيهم مع بعض لمدة 5 دقيقة، وبعد كده
ضيفي المكرونة ونصف كمية الجوز، واتركيها لمدة 4 دقائق على النار.
4. شيلي المكرونة من على النار وحطيها في طبق التقديم وزينيها بباقي الجوز والجبنة المبشورة.

طبق الحلو
مهلبية قمر الدين


المقادير:-

• نصف لفة قمر الدين
• كباية كبيرة سكر
• 6 أكواب مية
• كباية نشا
• كباية من اللوز المقشّر (أو أي مكسرات موجودة)

الطريقة:-



1. انقعي قمر الدين مدة ليلة كاملة في المية.
2. بعد ما تلاقي قمر الدين ذاب في المية هاتي حلة وصبيه فيها، وضيفي
إليه كباية مية كبيرة وسكر مع التقليب، وحطي حلة قمر الدين دي على النار
مع التقليب المستمر...


3. أثناء غليان قمر الدين على النار هاتي كباية مية وحطي فيها النشا وقلبيهم كويس...
4. بعد ما قمر الدين يغلي ضيفي إليه النشا تدريجياً مع التقليب
المستمر، وخدي بالك إن في الوقت ده تخلي النار هادية علشان تقدري إنك
تتحكمي فيه، وسيبيه على النار لمدة نص ساعة مع التقليب المستمر علشان ما
يلزقش.


5. بعد ما تلاقي قمر الدين بقى سميك شيليه من على النار وصبيه في أطباق
صغيرة واستني عليه لما يبرد، وبعد كده زينيه باللوز المقشر أو أي مكسرات
عندك ودخليه التلاجة وطلعي منه وكلي.